WAKAZI GEITA WAVAMIA KIKAO CHA MADIWANI

na Victor Eliud, Geita

WAKAZI wa vitongoji vya Katoma na Nyamalembo wilayani Geita, wamevamia ofisi za halmashauri ya wilaya hiyo na kuvuruga kikao cha madiwani kilichokuwa kikiendelea, wakilalamikia hatua ya mkurugenzi kuingilia kati madai yao ya fidia, ili kupisha mwekezaji wa kampuni ya mgodi wa dhahabu wa Geita GGM.

Hatua hiyo ilikuja baada ya wananchi hao ambao wengi wao ni wakulima kuokota barua iliyosainiwa na Kaimu Mkurugenzi huyo, Charles Kimaro, yenye Kumb.Na.GDC/L.20/3/VOL.II/I ya Septemba 11, mwaka huu, kwenda kwa mkuu wa mkoa wa Mwanza ya kumteua Ofisa Misitu na Ofisa Kilimo na Mifugo Wilaya ya Geita kuwa mjumbe wa kuhakiki madai ya fidia ya wananchi hao.

Baada ya kutinga katika ofisi hizo na kugundua kulikuwa na kikao hicho waliamua kung’ang’nia kwenye lango kuu la ukumbi wa halmashauri hiyo wakishinikiza kutoa malalamiko yao.

Kitendo hicho kiliwalazimu madiwani kusimamisha kikao hicho kwa muda na kukutana na wananchi hao ambao walidai Kaimu Mkurugenzi anatafuta maslahi binafsi kupitia migongo ya wananchi wanyonge wanaotakiwa kulipwa fidia kupisha mgodi huo.

Walieleza kuwa hawakubaliani na kitendo cha Kaimu Mkurugenzi huyo kuingilia kati suala hilo kwa kuwa tayari lilishafanyika chini ya Ofisi ya Mthamini Mkuu wa Serikali na kwamba hatua ya kiongozi huyo inalenga kuwakumbatia wawekezaji na kuwanyonya wazawa.

Walidai kwa mujibu wa ripoti ya mthamini mkuu wa serikali wanapaswa kulipwa sh bilioni 13.2, lakini mkurugenzi huyo anapinga na kushinikiza walipwe sh bilioni 8.2.

Kwa upande wake, Ofisa Uhusiano wa mgodi wa GGM, Clement Msalangi, alisema hana taarifa za kuwepo kwa malalamiko hayo na kwamba uongozi wa mgodi huo haujapokea barua ya mkurugenzi wala uongozi wa mgodi haujapata nakala ya ripoti ya mthamini mkuu wa serikali kuhusu fidia ya wakulima hao.

Akizungumzia hilo Kaimu Mkurugenzi wa halmashauri hiyo Daud Sweke, alisema suala hilo liko kwenye mamlaka husika na kwamba ni kosa wananchi kuwa na nyaraka ya serikali huku akitoa wito kwa wananchi hao kuvuta subira wakati suala hilo likiendelea kushughulikiwa.

Chanzo: Tanzania Daima