WACHIMBAJI WAKUBWA GEITA KUNYANG’ANYWA MAENEO

na Mwandishi wetu, Geita

SERIKALI mkoani Geita imeanza mchakato wa kuhakikisha wachimbaji wakubwa wa dhahabu wanaohodhi maeneo wananyang’anywa na kupatiwa wachimbaji wadogo.

Mkuu wa Mkoa wa Geita Magalula, Saidi Magalula, alitoa kauli hiyo juzi katika taarifa yake ya mkoa mbele ya Waziri wa Nchi Ofisi ya Rais Mahusiano na Uratibu, Stephen Wassira, mjini Geita.

Alisema kitendo cha wachimbaji wakubwa kuchukua maeneo hayo bila ya kuyaendeleza kwa shughuli za uchimbaji kimechangia migogoro ya mara kwa mara kati yao na wachimbaji wadogo.

Kwa sababu hiyo, alisema tayari uongozi wa mkoa kupitia Idara ya Madini, umeandika barua kwenda Wizara ya Nishati na Madini ili kuomba kuchukua hatua ya kuyatwaa maeneo hayo na kuyagawa kwa wachimbaji wadogo ikiwa ni moja ya njia za kupunguza migogoro hiyo.

Magalula alisema kila wananchi wanapogundua uwepo wa dhahabu katika maeneo mbalimbali linaibuka kundi la wachimbaji wakubwa na kudai kumiliki maeneo hayo, lakini wamekuwa wakiyahodhi tu jambo ambalo limekuwa kero kubwa kwa wananchi pia kuchangia migogoro mingi katika sekta hiyo.

Hata hivyo, alisema hatua ya serikali ya kutenga maeneo ya wachimbaji wakubwa na wadogo kwa kiasi kikubwa kutapunguza kama sio kumaliza changamoto hiyo na kuboresha mahusiano kati ya wananchi na serikali yao, lakini pia kati ya wananchi, wawekezaji na wachimbaji wakubwa.

“Hivi sasa uongozi wa mkoa umeendelea kuwahimiza na kuhamasisha wananchi na wachimbaji wadogo kujiunga kwenye vyama vya ushirika na saccos ili kurahisisha kushughulikia changamoto zinazowakabili,” alisema Magalula.

Kwa upande wake Waziri Wassira alisema njia pekee ya kuwasadia wananchi kunufaika na rasilimali za madini ni kwa kuwatengea maeneo wachimbaji wadogo, hivyo kupunguza tatizo la ajira kwa vijana.

Chanzo: Tanzania Daima