WATUHUMIWA WA UBAKAJI,MAUAJI WAACHILIWA GEITA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

WATU wanne waliokamatwa kwa tuhuma ya kumkaba na kisha kumnyonga mwanafunzi wa darasa la pili (jina linahifadhiwa) katika Shule ya Msingi Kalangalala wameachiwa huru kabla ya kufikishwa mahakamani katika mazingira ya kutatanisha.

Kuachiwa kwa watuhumiwa hao waliotajwa kwa majina ya Shija Juma, Dotto Juma na Kulwa Juma, ambao ni ndugu na mwanamke mmoja aliyejulikana kwa jina moja la Shida, kumewashangaza wananchi wakiwemo wazazi wa marehemu, huku watendaji wa vyombo vya dola wakikana kuhusika na jambo hilo.

Mama mzazi wa mtoto huyo, Peki Makoye, akizungumza na Tanzania Daima Jumatano kwa njia ya simu kutoka jijini Mwanza, alisema kuwa ameshangazwa kusikia kuwa watuhumiwa hao wako huru wakati wao wakiwa bado katika msiba.

“Nimeshangaa kusikia kuwa watuhumiwa wako huru, wakati tulikubaliana polisi kuwa tumalize kwanza msiba ndipo tuweze kuendelea na kesi,” alisema kwa masikitiko.

Baba wa marehemu, Kilalio Kilalio, alisema kuachiwa kwa watuhumiwa hao kumezidi kuwaumiza zaidi, na akaomba mamlaka za juu za dola kuingilia kati ili haki iweze kutendeka.

Hata hivyo, viongozi wa Jeshi la Polisi mkoani hapa kila mmoja kwa nyakati tofauti wameonyesha kushangazwa kwao na kukana kuhusika kwa namna moja ama nyingine na kuachiwa huru kwa watuhumiwa hao.

Mkuu wa kituo cha polisi cha Geita mjini (OCS), Chimakula Enock, alipoulizwa kuhusu kuachiwa kwa watuhumiwa hao, alisema yeye sio msemaji wa jambo hilo na kwamba watafutwe wasemaji.

Kamanda wa Polisi wa Wilaya ya Geita, Sadock Bwire, alipohojiwa na Tanzania Daima Jumatano juu ya kuachiwa huru kwa watu hao, alionekana kushangazwa na jambo hilo.

Kamanda wa Polisi mkoani hapa, Joseph Konyo, alipoulizwa jambo hilo kwa njia ya simu, alidai yuko safarini Mwanza na akaelekeza kumwona kaimu wake, Prudencia Protas, ambaye naye alisema hana taarifa na akaahidi kulifuatilia ili ajue ukweli wake.

Watuhumiwa hao wanadaiwa kumuua mtoto huyo Mei 3, mwaka huu katika tukio linalodaiwa kuhusishwa na uhasama wa mapenzi.

Chanzo:Tanzania Daima