Mauaji ya vikongwe yatikisa Geita

MAUAJI ya kikatili dhidi ya vikongwe yanayodaiwa kufanywa na kikundi cha Chinja Chinja yamezidi kuutikisa Mkoa wa Geita baada ya kikongwe mwingine, Maua Ikoti (60) mkazi wa Kasang'hwa, wilayani Geita kuuawa kwa kukatwa panga nyumbani kwake.

Kikundi cha Chinja Chinja kinadaiwa kuhusika na mauaji ya vikongwe kwa imani za kishirikina katika mikoa ya Kanda ya Ziwa ikiwamo Shinyanga, Mwanza, Simiyu, Geita na Mara.

Mauaji hayo yamekuja huku takwimu zikionesha kuwa jumla ya vikongwe watatu wameuawa na kikundi hicho katika kipindi cha wiki nne.

Tukio la mauaji hayo limetokea saa 6 usiku wa kuamkia juzi Jumapili baada ya wauaji hao kuvamia familia hiyo na kisha kuingia ndani ya chumba alimolala kikongwe huyo.

Kwa mujibu wa Mwenyekiti wa Serikali ya Kijiji cha Kasang’hwa, Maganiko Ndiomali, alisema wauaji hao walimkata kwa panga kikongwe huyo sehemu za kichwani, mikono, shavuni na kwenye matiti na kumuua.

Alisema pamoja na mayowe yaliyopigwa na watoto wa marehemu ya kuomba msaada, juhudi za wananchi kuwasaka wahusika wa tukio hilo ili kuwatia nguvuni hazikuzaa matunda ambapo walitoweka kusikojulikana.

Mauaji ya vikongwe mkoani hapa yanadaiwa kuhusishwa na imani za kishirikina ambapo kikundi kinachodaiwa kuhusika na mauaji hayo hukodiwa na baadhi ya watu ili kulipiza kisasi baada ya kufiwa na ndugu zao wakiamini kwamba wamerogwa.

Kikundi hicho kinadaiwa kuhusika na mauaji ya kikatili dhidi ya mwanamke, Mondesta Nchambi (53) mkazi wa Kitongoji cha Isabilo, Kijiji cha Nyakarango, wilayani Chato, mkoani Geita, kwa kumchinja shingo kwa kutumia kitu chenye ncha kali kisha kutenganisha kichwa na kiwiliwili chake.

Mauaji hayo yalitokea Septemba 26, mwaka huu na kwamba katika kipindi kisichozidi wiki nne jumla ya vikongwe watatu wameuawa kikatili katika vijiji vya Katoro, Nyakarango na Kasang’hwa mkoani Geita.

Hata hivyo kwa mujibu wa Kamanda wa Polisi mkoani Geita, Leonard Paulo, mbali na kuthibitisha kuwapo kwa matukio hayo hakuna mtu wala watu waliokamatwa kuhusika na mauaji hayo.

Mauaji mengine yalifanywa Juni 17, 2013 ambapo Jacob Simbakira (52) mkazi wa Kijiji cha Mwekako, Chato, Geita aliuawa na watu wasiojulikana kwa kuchinjwa shingo na kutenganishwa kichwa na kiwiliwili chake.

Septemba 14, 2013, kikundi cha Chinja Chinja kilimuua Ester Mashenene (61) mkazi wa Kitongoji cha Bugayambelele, Kijiji cha Katoro, Geita.

Chanzo: Tanzania Daima