MBUNGE WA CHADEMA AMWAGIA SIFA JK, 7,682 KUUNGANISHIWA UMEME.

NA MARCO KANANI 
BUKOMBE.                                                                                                   10/11/013.
 
MBUNGE wa jimbo la Bukombe mkoani Geita, profesa Kulikoyela
Kahigi (CHADEMA), amemwagia sifa lukuki Rais Dkt Jakaya Kikwete kwa kuchapa
kazi na kutekeleza kikamilifu ahadi zake na Ilani ya Uchaguzi ya CCM.
 
Amesema pamoja na kuchapa kazi, Rais Kikwete na serikali
yake ni msikivu na hana ubaguzi, hivyo amastahili kuungwa mkono na wananchi
wote wakiwemo wana Chadema.
 
Mbunge huyo ‘alimwaga’ pongezi hizo juzi alipopewa nafasi ya
kusalimia wananchi kabla ya Rais kuhutubia mkutano mkubwa wa hadhara,
uliofanyika kwenye eneo la kituo cha mabasi cha Bukombe.
 
“Ndugu zangu wananchi, mnyonge mnyongeni lakini haki yake
mpeni. Rais Kikwete ni msikivu na mchapa kazi anayetekeleza ahadi zake
kikamilifu, nawasihi viongozi anaowateuwa kufanya naye kazi muige mfano wake.”
Alisema Profesa huyo.
 
Huku akishangiliwa na wananchi wakiwemo wana CCM kwa
kumfagilia Rais, Mbunge huyo alisema serikali ya CCM imefanya jambo la msingi
kusikia kilio cha wananchi wa jimbo hilo na kuanza kutengeneza barabara ya
Bwanga Lunzewe kwa kiwango cha lami.
 
Profesa Kahigi alitumia fursa hiyo kumuomba Rais Dkt Kikwete
barabara ya Katoro hadi Ushirombo nayo ijengwe kwa kiwango cha lami, ombo
ambalo Rais alilikubali na Waziri wa Ujenzi, Dkt John Magufuli akaahidi
kuharakisha ujenzi wa barabara hizo.
 
Geita yetu Blog