Barabara ya Masumbwe- Mbogwe yapandishwa hadhi

WIZARA ya Ujenzi imeipandisha daraja barabara inayounganisha maeneo ya Masumbwe na Makao Makuu ya Wilaya ya Mbogwe, mkoani Geita kuwa na hadhi ya mkoa. Taarifa kwa vyombo vya habari iliyotolewa jijini Dar es Salaam jana na kusainiwa na Msemaji wa Wizara ya Ujenzi, Martin Ntemo, ilieleza awali barabara hiyo ilikuwa ikihudumiwa na wilaya, lakini ikipatiwa matengenezo ambayo hayakukidhi ongezeko la magari yanayotumia barabara hiyo kwa sasa. Alisema Rais Jakaya Kikwete akiwa njiani kutokea mji wa Masumbwe kupitia makao makuu ya wilaya mpya ya Mbogwe kabla ya kuingia Geita alisimamishwa mara kadhaa na wananchi wanaoishi katika vijiji inakopita barabara hiyo ambao walitumia fursa hiyo kuwasilisha kero zao hususan suala ya barabara hiyo kutokidhi mahitaji. Ntemo alisema akijibu maombi ya wananchi hao, mbele ya rais, Waziri wa Ujenzi, Dk. John Magufuli, alimweleza rais kuwa barabara hiyo inayolalamikiwa ilikuwa chini ya usimamizi wa wilaya. Hata hivyo, kwa kuzingatia umuhimu wa barabara hiyo na uchanga wa wilaya hiyo mpya, alikipokea kilio cha wananchi hao na kukubali barabara hiyo ipandishwe  daraja na kuwa ya mkoa. “Nitatumia mamlaka niliyopewa chini ya Sheria ya Mfuko wa Barabara Namba 13 ya mwaka 2007 kuipandisha barabara hii ambayo inaanzia Masumbwe kupitia Mbogwe,  Nyikanga hadi Butengo Lumasa yenye urefu wa kilometa 81 kwamba itakuwa ya mkoa na hivyo kuwa chini ya usimamizi wa Tanroads,” alisema Waziri Magufuli. Katika hatua nyingine, Magufuli  alibainisha katika mipango ya mwaka ujao wa fedha wa 2014/2015, wizara yake itaanza kufanya upembuzi yakinifu na usanifu wa kina wa barabara inayotokea mji wa Katoro hadi Ushirombo yenye urefu wa kilometa 56 ili kuijenga kwa kiwango cha lami. Chanzo;Tanzania Daima