Ukatili: Mwanamke achinjwa na kichwa chake kuchukuliwa na wauaji

WATU wanaosadikika kuwa wa kikundi cha Chinja Chinja wamefanya mauaji ya kutisha baada kumuua mwanamke,Mondesta Nchambi (53) mkazi wa kitongoji cha Isabilo kijiji cha Nyakarango wilayani Chato mkoani Geita,kwa kumchinja shingo kwa kutumia kitu chenye ncha kali kisha kutenganisha kichwa na kiwiliwili chake.

Mauaji hayo ya kusikitisha yametokea usiku wa kuamkia leo(Alhamisi)ambapo mwili wa marehemu huyo ulikutwa ukiwa umetelekezwa kandokando ya kichaka kilichopo umbali wa mita 300 kutoka nyumbani kwake.

Kamanda wa polisi mkoa wa Geita, Leonard Paulo, amethibitisha kutokea kwa tukio hilo na kudai kuwa watu wasiofahamika walifanya unyama huo kisha kutokomea kusikojulikana.

Akizungumza na waandishi wa habari ofisini kwake Kamanda Paulo amesema taarifa za awali zimeonyesha kuwa kabla ya kukutwa na mauti hayo mwanamke huyo aliondoka nyumbani kwake juzi majira ya mchana.

Kabla ya kukutwa na mauti mwanamke huyo alielekea kwenye gulio la wakulima lililopo kweye kijiji jirani cha Kazunguti,lakini wakati wa kurejea nyumbani kwake usiku alikutana na watu hao ambao walimchinja shingoni na kutenganisha kichwa na kiwiliwili.

Inasadikiwa kuwa wauaji hao waliondoka na kichwa cha mwanamke huyo kutokana na polisi wilayani Chato kwa kushirikiana na wananchi wa kijiji hicho kukitafuta kwa zaidi ya saa 6 pasipo mafanikio ya kukipata.

Kikundi cha Chinja Chinja kinadaiwa kujihusisha na mauaji ya vikongwe katika mikoa ya Kanda ya ziwa kama Simiyu,Geita,Shinyanga,Mara na Mwanza kwa kukodiwa na watu kutokana na imani za kishirikina.